[CDM] Myanmar Diplomat from LA Myanmar Office joins CDM

LA မြန်မာကောင်စစ်ဝန်ရုံး အရာရှိ ဒေါ်မြမြကြည် - CDM ဝန်ထမ်းလှုပ်ရှားမှုမှာ ပူးပေါင်းပြီ

(မိုးမခ) မတ် ၂၊ ၂၀၂၁

အမေရိကန်ပြည်ထောင်စု ကယ်လီဖိုးနီးယားပြည်နယ် လောစ့်အိန်ဂျယ်လိစ်မြို့ရှိ မြန်မာကောင်စစ်ဝန်ချုပ်ရုံးက သံရုံးအုပ် ဒေါ်မြမြကြည်ဟာ အာဏာသိမ်းစစ်ကောင်စီကို အသိအမှတ်မပြုဘဲ ဒီကနေ့ မတ်လ ၂ ရက်နေ့က စပြီး CDM ဝန်ထမ်းလှုပ်ရှားမှုမှာပါဝင် ပူးပေါင်းလိုက်ပြီဖြစ်ပါတယ်။

သူရဲ့ ဖေ့စ်ဘွတ်စာမျက်နှာမှာ သဘောထားကို တရားဝင်ထုတ်ဖော်ပြောကြားလိုက်ပါတယ်။

ကျွန်မ ဒေါ်မြမြကြည်သည် နိုင်ငံခြားရေးဝန်ကြီးဌာနတွင် တာဝန်ထမ်းဆောင်ခဲ့သည်မှာ ၂၃ နှစ်ကျော်ရှိပြီဖြစ်ပါသည်။

ကျွန်မအား ပြည်သူလူထုရွေးကောက်တင်မြောက်ထားသော ပြည်သူ့အာဏာရရွေးကောက်ခံ ပြည်သူ့အစိုးရဖြစ်သည့် နိုင်ငံတော်သမ္မတကြီး ဦးဝင်းမြင့်နှင့် နိုင်ငံတော်အတိုင်ပင်ခံပုဂ္ဂိုလ်/ နိုင်ငံခြားရေးဝန်ကြီး ဒေါ်အောင်ဆန်းစုကြညတို့၏ တာဝန်ပေးစေလွှတ်မှုကြောင့် မြန်မာကောင်စစ်ဝန်ချုပ်ရုံး၊ လော့စ်အိန်ဂျယ်လိစ်မြို့တွင် သံရုံးအုပ်အဖြစ် ပြောင်းရွှေ့တာဝန်ထမ်းဆောင်ခဲ့ သည်မှာ (၃) နှစ်ပြည့်မြောက်ပြီးဖြစ်ပါသည်။

သို့သော် ၂၈-၂-၂၀၂၁ ရက်နေ့တွင် အာဏာသိမ်းစစ်အုပ်စုမှ နိုင်ငံခြားရေးဝန်ကြီးဌာသို့ပြောင်းရွှေ့ရန် တရားမဝင်အမိန့်တစ်ရပ်ကိုထုတ်ပြန်ခဲ့ပါသည်။ ထိုအမိန့်သည် တရားမဝင်သည့်အတွက် ကျွန်မအနေဖြင့်ပြောင်းရွှေ့မည်မဟုတ်ပါ။ ပြည်သူ့အာဏရ တရားဝင်ပြည်သူ့အစိုးရ ( သို့မဟုတ်) ယနေ့ခန့်အပ်လိုက်သည့် ခေတ္တပြည်ထောင်စုဝန်ကြီးများဖြစ်သည့် (နိုင်ငံခြားရေးဝန်ကြီး)မှ ကျွန်မအား ပြောင်းရွှေ့မိန့်ထုတ်ပြန်မှသာလျှင် ကျွန်မအနေဖြင့် အမိန့်နာခံ၍ ပြောင်းရွှေ့တာဝန်ထမ်းဆောင်သွားမည်ဖြစ်ပါသည်။

သို့ပါသောကြောင့် အာဏာသိမ်းစစ်အုပ်စု အမြန်ကျဆုံးရန်၊ အာဏာသိမ်းစစ်အုပ်စု၏ အုပ်ချုပ်မှု ယန္တရားများရပ်တန့်သွားရန် ရည်ရွယ်ချက်ဖြင့် ၂-၃-၂၀၂၁ ရက်နေ့မှ စ၍ မိမိဆန္ဒအလျှောက် ဆုံးဖြတ်ချက် ခိုင်မာစွာဖြင့် ပြည်သူနှင့်အတူ ပူးပေါင်းပါဝင်၍ ငြိမ်းချမ်းစွာဆန္ဒဖော်ထုတ်ခြင်းဖြင့် Civil Disobedience Movement (CDM) တွင် ပြုလုပ်သွားမည် ဖြစ်ပါသည်။ ကျွန်မသည် အလုပ်ထွက်သည်မဟုတ်ပါ ၊ ရုံးမတက်၍ ရုန်းထွက်ခြင်းသာဖြစ်ပါသည်။ ထို့ကြောင့် မိမိ၏ လုပ်ရပ်သည် မိမိတစ်ဦးတည်း၏သဘောဆန္ဒအရ ပြုလုပ်ခဲ့သည့်အတွက် မိမိမှာသာတာဝန်ရှိပြီး၊ မိသားစု ၊ မိတ်ဆွေ၊ သူငယ်ချင်းအပေါင်းအသင်းများနှင့် လုံးဝ( လုံးဝ) မသက်ဆိုင်ပါကြောင်း ဖော် ပြအပ်ပါသည်။

အကြမ်းဖက်အုပ်စု အလိုမရှိ။

--

Send email to - editors@moemaka.net  to contact and contribute with MoEmAKa

MoeMaKa on Facebook Page from here  (For Burma / Myanmar User)

MoeMaKa News & Media covering Burmese Community
PO Box 320-207, San Francisco, CA 94132-0207, USA.
http://MoeMaKa.Com - Burmese Language
http://eng.moemaka.net  - English Edition
http://MoeMaKa.Net - Audio & Video Archives