မြန်မာရှိ ဘီယာအကျိုးတူလုပ်ငန်း ဂျပန်ကုမ္ပဏီ Kirin ရပ်ဆိုင်းမည် - Japan stopped joint business with Regime

မြန်မာရှိ ဘီယာအကျိုးတူလုပ်ငန်း ဂျပန်ကုမ္ပဏီ Kirin ရပ်ဆိုင်းမည်

တိုကျို၊ ဖေဖော်ဝါရီ ၅

ဂျပန်နိုင်ငံ၏ Kirin Holdings က မြန်မာနိုင်ငံအတွင်းရှိ ၎င်းတို့၏ အကျိုးတူပူးပေါင်းမှုနှစ်ခုကို ရပ်ဆိုင်းသွားမည်ဟု ထုတ်ပြန်ကြေညာခဲ့ပြီး ယခုတစ်ပတ်အစောပိုင်းကဖြစ်ပွားခဲ့သည့် တပ်မတော်အာဏာသိမ်းမှုကို လူသိရှင်ကြားပြောဆိုဝေဖန်ခဲ့သည့် ပထမဆုံးဂျပန်ကုမ္ပဏီဖြစ်လာခဲ့ကြောင်း Nikkei Asia သတင်းဌာနတွင် ဖော်ပြသည်။

“တပ်မတော်ရဲ့လုပ်ဆောင်ချက်တွေဟာ ကျွန်ုပ်တို့ရဲ့ စံနှုန်းတွေနဲ့ လူ့အခွင့်အရေးမူဝါဒတွေနဲ့ ဆန့်ကျင်နေပါတယ်” ဟု အဆိုပါ အဖျော်ယမကာကုမ္ပဏီက ဖေဖော်ဝါရီလ ၅ ရက်နေ့တွင် ထုတ်ပြန်ခဲ့သည်။

အဆိုပါဂျပန်ကုမ္ပဏီသည် မြန်မာဘီယာနှင့် မန္တလေးဘီယာတို့တွင် ရှယ်ယာအများစု ပိုင်ဆိုင်ထားပြီး မြန်မာ့တပ်မတော်အတွက် လူမှုရေးရန်ပုံငွေရှာပေးနေသည့် အဖွဲ့အစည်းဖြစ်သည့် မြန်မာ့စီးပွားရေး ဦးပိုင်လီမီတက်နှင့် Kirin တို့ ပူးတွဲပိုင်ဆိုင်ခြင်းဖြစ်သည်။

“ကျွန်ုပ်တို့မှာ ရွေးချယ်စရာ မရှိပါဘူး။ ဒါပေမဲ့ မြန်မာ့စီးပွားရေးဦးပိုင်လီမိတက်နဲ့ လက်ရှိ အကျိုးတူပူးပေါင်း ဆောင်ရွက်မှုကို ရပ်ဆိုင်းသွားမှာပါ။ ဒီရပ်ဆိုင်းမှု ထိရောက်အောင် အရေးကြီးလိုအပ်တဲ့ အဆင့်တွေကို လုပ်ဆောင်သွားမှာပါ” ဟု Kirin က ထုတ်ပြန်သည်။

Kirin သည် မြန်မာဘီယာ၏ ရှယ်ယာ ၅၅ ရာခိုင်နှုန်းကို အမေရိကန်ဒေါ်လာ သန်း ၅၆၀ ဖြင့် ၂၀၁၅ ခုနှစ်က ဝယ်ယူခဲ့ပြီး ၂၀၁၇ ခုနှစ်တွင် မြန်မာ့စီးပွားရေးဦးပိုင်လီမိတက်သို့ ရှယ်ယာ ၄ ရာခိုင်နှုန်း ပြန်လွှဲပေးခဲ့သည်။

“တိုင်းပြည်က ဒီမိုကရေစီပြုပြင်ပြောင်းလဲရေးကာလအတွင်း ဝင်ရောက်နေတဲ့အချိန်မှာ ကျွန်ုပ်တိုရဲ့ စီးပွားရေးလုပ်ငန်းကတစ်ဆင့် တိုင်းပြည်စီးပွားရေးနဲ့ လူထုအပေါ်ကို အပေါင်းလက္ခဏာဆောင်တဲ့ အထောက်အပံ့ပေးနိုင်လိမ့်မယ်လို့ ယုံကြည်တဲ့အတွက် ကျွန်ုပ်တို့ ၂၀၁၅ ခုနှစ်မှာ မြန်မာနိုင်ငံအတွင်း ရင်းနှီးမြှုပ်နှံဖို့ ဆုံးဖြတ်ခဲ့တာပါ” ဟု Kirin က ထုတ်ပြန်သည်။

မြန်မာနိုင်ငံအတွင်း ရင်းနှီးမြှုပ်နှံထားသည့် နိုင်ငံခြားကုမ္ပဏီများသည် လူ့အခွင့်အရေးအဖွဲ့များ၏ ဖိအားပေးမှုကို ခံနေခဲ့ရသည်။

တက်ကြွလှုပ်ရှားသူများသည် တနင်္လာနေ့ (ဖေဖော်ဝါရီ ၁ရက်နေ့) တပ်မတော် အာဏာသိမ်းမှု မတိုင်ခင်ကပင် တပ်မတော်အတွက် အကျိုးဖြစ်စေသည့် ၎င်းတို့၏ အကျိုးတူပူးပေါင်းဆောင်ရွက်မှုများ ရပ်ပစ်ရန် Kirin ကို တောင်းဆိုခဲ့ကြသည်။

Kirin ၏ ထုတ်ပြန်ချက်ကို ကာလရှည်စောင့်ခဲ့ရသော်လည်း ယခုလုပ်ဆောင်မှုကိုကြိုဆိုကြောင်း လူ့အခွင့်အရေးစောင့်ကြည့်အဖွဲ့က ဆိုသည်။

“တပ်မတော်နဲ့ ပူးပေါင်းမှုရှိတဲ့ တခြားနိုင်ငံခြားကုမ္ပဏီတွေလည်း အရေးပေါ်နဲ့ ပွင့်လင်းမြင်သာမှု ရှိတဲ့ပုံစံမျိုးမှာ Kirinရဲ့ ခြေရာကိုနင်းပြီးတော့ လိုက်လုပ်သင့်တယ်” ဟု အဆိုပါအဖွဲ့အစည်း၏ အာရှအစီအစဉ်ရေးရာအရာရှိ တပေးကာဆိုင်းက ပြောကြားခဲ့သည်။

မြန်မာနိုင်ငံတွင်း လုပ်ဆောင်လျှက်ရှိသည့် အမေရိကန်ဒေါ်လာ တစ်ဘီလီယံတန် စီမံကိန်းကို ထိုင်းနိုင်ငံ၏ အကြီးဆုံးစက်မှုဇုန်တည်ဆောက်ရေးလုပ်ငန်းဖြစ်သည့် အမာတာကလည်း လုပ်ငန်းရပ်ဆိုင်းလိုက်ကြောင်း ဖေဖော်ဝါရီလ ၂ရက်နေ့က ကြေညာထားသည်။